COMUNICADO EPISCOPAL

Corona Virus nuúdar moras foun ida nebeé perigu ba vida nebeé daet ba mundu tomak (epidémia mundial) no nasaun lubuk ida mak halo ona prevensaun ba moras ida neé; no moras ida neé passa liu husi kontatu isin nian, biar iha Timor Leste ita seidauk hetan kazu konfirmadu, neéduni husu ba Povo tomak atu kalma nafatin maibe diak liu ita halo prevensaun atu evita moras ida neé bele kona ita.

Tan ida neé, Igreja Timor hamutuk ho Amo Papa nebeé halo mos nia prevensaun ba moras neé, konvida ita atu halo tuir rekomendasaun Organizasaun Saúde Mundial no pessoas Saúde ita nian, atu;

1. Fase liman bebeik

2. Kuidadu fatin mos

3. Fani no mear tenke taka ibun

4. Evita atu kontatu ho ema seluk

5. Evita atu labele kontatu ho animal fuik

6. Membru família sira nebeé foin fila husi rai liur mai, evita atu halo kedan kontatu físika (kaer liman, rei malu, hakuak malu).

Tamba Uma Kreda iha Nia selebrasaun sira halibur ema barak no Kreda sai fatin nebeé ema barak ba.

Bainhira moras ida neé seidauk hadaet, Kreda Timor akonsella prevensaun balun durante ita nia selebrasaun sira.

1. Liman labele kona agua benta fatin nebeé iha Uma Kreda nia Odamatan

2. Evita rei estatua sira nebeé iha uma Kreda laran

3. Labele kaer liman wainhira fo paz ba malu

4. Simu deit komunhaun iha liman

5. Evita hola bensaun; rei liman

6. Igreja fo konsellu ba ema sira nebeé mak moras, isin fraku, atu lalika mai missa, reja iha uma deit.

Biar Mundu tomak no ita mos liu hela prova ida neé, ita hatene katak Nai Maromak sei la taka matan no tilun ba ita nia harohan.

Neé duni husu atu ita hotu reja. Hanesan Salmista dehan: “Rahun diak ba sira nebeé tau fiar iha Maromak” (Sal.4,5).

Dili, 13 de Março de 2020

Assinatura Ofisial

1. Dom Basilio do Nascimento

Bispo de Baucau e Secretário Geral da CET

2. Dom Virgilio do Carmo da Silva

Arc. Bispo de Dili e Pro-Presidente da CET

3. Dom Norberto do Amaral

Bispo de Maliana – Presidente da CET